يا ترى الحب حلال ولا حرام؟ !!(تعالوا نشوف اجابه السؤال)

كتير مننا وكل الأعمار بيسألوا السؤال ده: يا ترى الحب حلال ولا حرام؟
بيكتبوا عن مشاعر جميلة وقوية حاسين بيها ولكنها مختلطة بالخوف من كون اللي حاسينه ده حرام والإحساس العميق بالذنب؟

بيسألوا دايما هل اللي بيعملوه ده يتناقض مع تدينهم..


ليه بنسأل الحب حلال ولا حرام وعمرنا ما سألنا يا ترى الكره حلال ولاحرام؟


قبل ما نجاوب على السؤال ده لازم نعرف الأول إيه هو الحب؟ إيه مفهومه
وبيحصل ازاي؟ وحاجات كتير قوي غير كده..... وبعد كده لازم نعرف طيب لو حلال ليه الناس بتسأل السؤال ده؟ ولو حرام ليه الناس ما بيبطلوش يحبوا؟ ليه؟...........

الحب هو

ده مش عنوان لـ "أحمد رجب" دي محاولة لتعريف الحب، ومش محتاجة أقول كم
إن المشاعر الإنسانية مالهاش تعريف واضح ومحدد، لكن هنحاول نلاقي أقرب
تعريف له.

الحب هو حالة نفسية يعيشها الإنسان نتيجة
لتعلقه بشخص وإعجابه الشديد به بدون إرادة منه، وخلوا بالكم من حكاية
"بدون إرادة" دي لأن هو ده السر، يعني لازم الإنسان ده ما يكونش مقرر
يحب، يعني ما ينزلش الواحد من بيته الصبح وهو بيقول "أنا نويت أحب
النهاردة"، ما يشوفش الولد بنت جميلة أو تشوف البنت ولد وسيم ويقولوا
"أنا قررت أحب الشخص ده"، ده ما يبقاش حب ده يبقى إعجاب... يبقى أي
حاجة تانية لكن حب لأ.

الحب حلاااااااااااال..... ولكن



الحب طبعا حلال مين يقدر يقول حرام، الحب ده قيمة سامية في حياتنا من غيرها حاجات كتير ممكن تروح، الحب ده مشاعر جميلة ونعمة كبيرة زرعها ربنا فينا. طيب لو حلال يبقى ليه السؤال؟...

الحقيقة إن السؤال ده بالرغم إنه بيتضمن كلمة حلال أو حرام
مالوش دعوة خالص بالدين لأن من المعروف إنّ الأوامر في الإسلام مرتبطة بما
في استطاعة الإنسان، والحب زي ما قلنا شعور لا إراداي حيث يقول سبحانه
وتعالى: "لا يكلف الله نفساً إلا وسعها" والدين ما بيقولكش "لا
تحب" ولكن بيقول لك لو حبيت فــ"لا للتجاوزات والسلوكيات" اللي بتخلي
الإنسان ينجرف للحرام، الإسلام بيقول لك حب بس حب بشروط وبقواعد .

السؤال ده مرتبط بالمجتمع والثقافة السايدة في المجتمع، المجتمع عندنا بسبب
بعض التصرفات اللي بيعملها اللي "مفترض إنهم بيحبوا" ربط بين الحب وسلسلة من الاتهامات بدء من كونه "قلة أدب" مرورا بأنه "تضييع وقت" وانتهاء بكونه "حرام شرعا".

وطبعا كلنا عارفين التصرفات والتجاوزات اللي بتحصل تحت مسمى الحب
البداية من "مسك الإيدين وتمشية بسيطة" والنهاية "ذكريات سيئة يتمنى
الاتنين ينسوها". واللي ما يعرفهوش اللي بيعملوا الحاجات دي إن الحاجات
دي بعيدة كل البعد عن جوهر الحب. دي ساعات بتكون السبب الأساسي في الحب، فيه ناس معتقدة إن الحب حرام لأن ما فيش طريقة محترمة للتعبير عنه، وكمان مافيش حدود للحب، دول يعملوا إيه؟؟

حب صح

مين قال إن الحب مالوش ضوابط أو حدود، بالعكس ده له ضوابط وحدود جامدة جدا، واحنا هنا بنتكلم عن الحب
مش الصحوبية ولا أي علاقة تانية من أي نوع. يعني علشان نكون واضحين
ومانلفش بالكلام وندور لنفترض إن فيه واحد بيحب واحدة زميلته في الدراسة أو
مكان العمل هيعمل إيه؟؟ هيروح يتعرف عليها ويفضل لازق لها ولو عجبها
هيفضلوا رايحين جايين مع بعض ومكالمات ورسايل على الموبايل وإيميلات وورد
ودباديب وخروجات و"بحبك" و"بامووت فيكِ" وحاجات زي دي.... نسأل
سؤالنا في الحالة دي يبقى الحب حلال ولا حرام ؟؟ كل السلوكيات والتصرفات اللي نتجت عن الحب ده حرااااااام. دي ببساطة الفكرة اللي عاوزة أوصلهالكم، لكن فيه شوية أسئلة..

س: طيب يعني اللي بيحب يعمل إيه؟

ج: اللي بيحب يروح يتقدم للي بيحبها لأن الغاية من الحب الحلال هي الزواج وده الفيصل في موضوع كون الحب حلال ولاحرام.
قال رسول الله ... صلى الله عليه وسلم ." لم أرى للمتحابين غير الزواج "

س: كده خبط لزق من غير ما يعرفها شوية ويعرف مشاعرها تجاهه؟

ج: لأ، مفروض لو واحد أعجب بواحدة يقعد يراقبها وما اقصدش بالمراقبة ينط
لها في كل حتة ويطاردها، لأ، يراقبها بمعنى يشوف تدينها وتعاملها مع الناس
وتصرفها في المواقف المختلفة وطباعها، وكلنا عارفين إن ده مش صعب في ظل
مناخ الشغل والدراسة، عجبته كان بها يبعت لها مرسال –زميلة لهم مثلا - ولو
وافقت يدخل البيت من بابه ولو ما وافقتش يبقى لا هو خسر ولا هي كمان.

س: طيب واللي ماعندهوش إمكانيات زواج وخلافه.. يروح يموت؟

ج: لأ طبعا يدخل البيت من بابه ويشرح لأهل اللي بيحبها ظروفه كلها وأكيد هما هيقدروا إنه دخل من الباب.

س: طيب لو رفضوا يبقى إيه الحل؟

ج: اللي بيقول كده ما بيحطش في دماغه ليه إنه برضه لو لف ودار الأهل برضه هيرفضوه لضعف إمكاناته.

ييجي حد ويقول لي طيب ده بالنسبة للولد، طيب والبنت....

البنت زي الولد



دي مش أغنية "سعاد حسني" دي حقيقة أقرها الشرع والدين في الموضوع ده.
س: يعني البنت هي اللي هتخطب الولد؟

ج: لأ طبعا هي برضه هتراقبه زي ما قلنا، ونفترض إنها شافت إنه إنسان كويس يبقى إيه العمل؟ تبعتله مرسال برضه.

س: يعني ع آخر الزمن البنت هتدلل على نفسها؟

ج: لأ، طبعا مين اللي قال الكلام ده؟ هي هتختار حد ثقة ينقل للي بتحبه
مشاعرها من غير مايجرحها ويجرح شعورها. وده اللي عملته السيدة "خديجة"
–رضي الله عنها- مع سيدنا النبي –صلى الله عليه وسلم- واحنا أكيد مش أحسن
منها. ممكن تقولوا ده كان سيدنا النبي، يعني مش أي حد. الرد سهل وبسيط، لما
السيدة "خديجة" عملت كده كان سيدنا "محمد" –صلى الله عليه وسلم –
لم يكن بعث بعد نبيا للأمة، يعني عملت كده علشان أخلاقه الكريمة، ده
بالإضافة إلى إن القرآن بيؤكد في أكتر من مكان على إن سيدنا "محمد" بشر
مثلنا "قل إنما أنا بشر مثلكم".

س: بس المجتمع هيبص لها ازاي؟

ج: مش دايما نظرة المجتمع صح. يعني فيه حاجات كتيرة حلال والمجتمع بيحرمها والعكس، فالأولى إنك تتمسك بالدين مش بالمجتمع.


في الآخر

علشان حبنا يبقى صح وربنا يرضى علينا لازم نخلي غايتنا من الحب هي الجواز، ونبعد خالص عن أي تصرف غلط تحت اسم الحب وبكده حبنا هيكون حلاااااااااااااااااااااااااااااااااااااال.

الصراحه انا الكلام ده عاجبني جدااااااااا جداااااااااا
وموافق كل كلمه فيه






انت بقي قريت الكلام ده؟؟
طيب رأيك إيه؟